Adriatik Lapaj, kryetar i koalicionit “Nisma – Shqipëria Bëhet”, ka reaguar pas vendimit të Kolegjit Zgjedhor që i dha mandatin Anila Dajkos, duke deklaruar se ndihet i tradhtuar nga Endri Shabani, me të cilin ka pasur një miqësi 12-vjeçare.
“E kam pasur shok e mik, ka ngrënë bukë tek shtëpia e nënës sime. Kjo ishte arsyeja pse e ula vigjilencën. Nuk e prisja që një shok të bënte këtë gjë,” tha Lapaj në një intervistë për News24.
Ai theksoi se për të dhe lëvizjen që përfaqëson, beteja nuk ishte për një mandat, por për lista të hapura dhe një garë të ndershme.
“Po të doja mandatin, e kisha të thjeshtë, sepse listën e kam firmosur vetë. Por ne donim ta hapnim garën për qytetarët. U bë një padrejtësi, por unë nuk lëviz nga parimet. Politika shqiptare na ka borxh 7 mandate, por kodi zgjedhor do ndryshojë,” u shpreh ai.
Lapaj konfirmoi se angazhimi i lëvizjes do të vazhdojë jashtë parlamentit:
“Beteja jonë nuk do të bëhet brenda, por rrugëve të atdheut. Ne jemi përfaqësues të 80 mijë qytetarëve që kërkojnë ndryshim.”
Duke folur për Dajkon, ai tha se është një “zonjë e nderuar dhe nënë e një prej kandidatëve tanë”, ndërsa për Shabanin shtoi se “nuk ekziston më” për të.