“5 minuta pushim sa të lironi foltoren dhe vijojmë me diskutimet”.
Me këtë fjali, kryetarja e Kuvendit Elisa Spiropali e ndërpreu seancën plenare ndërkohë që opozita bllokoi foltoren dhe i binte tavolinave me duar.
Seanca u shoqërua me debate të larta këtë të enjte, pasi mazhoranca rrëzoi kërkesën e PD për interpelancë me kryeministrin Edi Rama për çështjen Beccheti.
Bardhi kërkoi shpjegime nga kryeministri lidhur me 130 mln eurot që ka marrë sipas tij biznesmeni italian, Francesco Becchetti, nga llogaritë e shtetit shqiptar, pas sulmeve nga qeveria dhe vetë Rama.
Kryeparlamentarja Elisa Spiropali hodhi në votim kërkesën e demokratëve. Me shumicën e votave të mazhorancës, kërkesa për interpelancë u rrëzua.
“Janë besoj të qarta votat, me numërim, interpelanca nuk do të zhvillohet”, tha Spiropali. Ndërsa më herët gjatë replikave me Bardhin, Spiropali tha se kryeministri nuk do të ishte i pranishëm në seancën e sotme për shkak të agjendës së tij.
Ndërsa Bardhi akuzoi Ramën se po i fshihet Kuvendit dhe llogaridhënies për dëmin 130 mln euro që i shkaktohet buxhetit të shtetit.
“Çfarë do bëjë Rama, do i fshihet Kuvendit? Boll gënjyet dhe mashtruat opinionin publik. Thuajini shqiptarëve i humbëm 130 mln euro për një veprim kriminal të qeverisë shqiptare dhe zyrtarëve publikë. Këto 130 mln po shkojnmë në xhepat e individitit ndërsa mund të kishin shkuar për pensionistët dhe rrogat. Thuajini shqiptarëve që Edi Rama është frikacak. Edi Rama sheh nga mëngjesi deri në darkë ëndrra me Xibrakën”, tha Bardhi.
Deputeti i Partisë Demokratike, Edmond Spaho, i tha Kryetares Elisa Spiropali, se një ndryshim i papritur vërehej në qëndrimin e saj, për të cilin ai tha se ishte reflektuar në fjalor dhe edhe në shprehjen e fytyrës.
Spaho shprehu shqetësimin se Spiropali dukej “shumë e egër” dhe madje sugjeroi se “duket sikur ju kanë rrahur”, duke e pyetur nëse kishte ndodhur ndonjë ngjarje që kishte ndikuar në ndryshimin e saj.
“Zonja kryetare, vë re një ndryshim shumë të madh të qëndrimit tuaj, i cili shprehet në fjalor, madje dhe në fytyrë jeni shumë e egër, duket sikur ju kanë rrahur. Ka ndodhur ndonjë gjë? Sepse neve jemi deputet dhe ju kemi juve kryetaren tonë, dhe duhet të të dalim në krah nëse ju ka ndodhur gjë,” – tha Spaho.
Në reagimin e saj, Spiropali u përgjigj duke qeshur, ndërsa i tha demokratit: “As sqima juaj estetike nuk është për procedurë, ju lutem mbyllini mikrofonin, vijojmë më të tjerët”.
Radar.al