Është dënuar me 3 vite burgim Kristjan Kokaj, djali i Dekanit të Fakultetit Juridik në Shkodër, Gasper Kokaj.
Gjykata e Shkodrës e deklaroi fajtor dhe i dha dënimin me 3 vite burgim për akuzën e “Shkeljes së rregullave të qakullimit rrugor” me pasojë vdekjen dhe “Largim nga vendi i aksidentit”.
Por dënimi me burg mësohet se është pezulluar, duke e kaluar vuajtjen e dënimin në periudhë shërbimi prove, me kusht që Kukaj të mos kryejë ndonjë vepër penale.
Sipas dosjes hetimore të kësaj çështjeje mësohet se ka mbetur 69-vjeçari Martin Pjetri nga fshati Troshan i Shkodrës.
Ngjarja e rëndë ka ndodhur në 29 nëntor 2023 rreth orës 20:40,në vendin e quajtur “Freskia”. Pas aksidentit me vdekje, Kristjan Kokajështë larguar nga vendngjarja, duke braktisur automjetin tip “Peuget” në ambientet e një karburanti që ndodhet në rrugën Koplik-Hani i Hotit.
Makina me të cilën u godit për vdekje Martin Pjetri, është identifikuar dhe lokalizuar nga këqyerja e një seri pamjesh filmike të sekuestruara nga policia e Shkodrës.
Sipas burimeve u konstatua se makina ka pasur një pjesë të kofanos të shtrembëruar dhe xhamin e parë të thyer. Me zbulimin e makinës është arritur të zbulohet dhe pronari Kristjan Kokaj, i cili më pas është vënë në pranga.
Gjatë dëshmisë së tij, djali i dekanit të fakultetit Juridik në Shkodër, Kristjan Kokaj, ka deklaruar se ditën e ngjarjes në mbrëmje po kthehej nga zona e Velipojës në drejtim të Shkodrës.
Kokaj më tej tregon se ka ulur shpejtësinë e makinës, por nuk ka ndaluar plotësisht pasi sipas tij ka vërejtur nga pasqyrat e mjetit dhe nuk ka parë gjë të dyshimtë duke vijuar rrugën në drejtim të karburantit të xhaxhait të tij, Eduart Kokaj.
Nga ambientet e këtij karburanti, Kokaj me një mjet tjetër është larguar në drejtim të Shtëpisë në Shkodër.
Por pavarësisht nga ky deklarim Kokaj është arrestuar nga policia dhe më pas ndaj tij është vendosur masa e sigurimit “arrest në shtëpi”.