Gjykata Kushtetuese ka pranuar kërkesën e gazetarit Elton Qyno, duke shfuqizuar vendimet gjyqësore që kishin lejuar sekuestrimin e të dhënave të tij kompjuterike. Sipas vendimit të Kushtetueses, këto masa përbënin një ndërhyrje disproporcionale në lirinë e shprehjes, të garantuar nga neni 22 i Kushtetutës dhe neni 10 i Konventës Evropiane për të Drejtat e Njeriut.
Në vendimin e saj, Gjykata thekson se e drejta e gazetarëve për të mos zbuluar burimet nuk është një privilegj personal, por një garanci thelbësore e lirisë së medias dhe e të drejtës së publikut për t’u informuar. Zbulimi i burimeve mund të urdhërohet vetëm në prani të një baze të qartë ligjore dhe të një interesi publik mbizotërues.
Gjykata vlerësoi se gjykatat e zakonshme nuk kishin arsyetuar se përse ishte e domosdoshme identifikimi i burimeve të gazetarit dhe përse nuk mund të përdorej ndonjë mjet tjetër alternativ. Po ashtu, mungonte argumentimi i nevojës për urgjencë në sekuestrimin e të dhënave kompjuterike.
Për këto arsye, Kushtetuesja shfuqizoi vendimin e GJKKO-së së Shkallës së Parë nr. 501, datë 13.12.2023, si edhe të gjitha vendimet e gjykatave më të larta që e kishin lënë atë në fuqi. U pranua gjithashtu kërkesa për asgjësimin e të gjitha të dhënave të sekuestruara.
Në njoftimin zyrtar thuhet se Gjykata analizoi në detaje ndërhyrjen në lirinë e shprehjes të gazetarit, duke theksuar se liria e shtypit përfshin të drejtën për të ruajtur anonimatin e burimeve. U përdor edhe testi i proporcionalitetit sipas nenit 17 të Kushtetutës, ku rezultoi se ndërhyrja, ndonëse e mbështetur në ligj dhe e lidhur me një interes publik, nuk ishte e nevojshme dhe proporcionale, sipas standardeve të vendosura nga Gjykata Evropiane për të Drejtat e Njeriut.
Në lidhje me pretendimet për cenim të jetës private apo të lirisë personale, Gjykata Kushtetuese nuk i shqyrtoi, pasi kërkuesi nuk kishte ndjekur të gjitha mjetet juridike për këto çështje specifike.