Real Madridi ka reaguar me një deklaratë zyrtare vetëm 24 orë para finales së Kupës së Mbretit ndaj Barcelonës, duke kundërshtuar publikisht komentet e gjyqtarëve të caktuar për këtë përballje.
Në media u përhapën raportime se Real Madridi mund të bojkotojë ndeshjen nëse nuk ndryshohen gjyqtarët, konkretisht Ricardo De Burgos Bengoetxea, i cili pritet të gjykojë takimin. Ky i fundit, në një deklaratë emocionale për shtyp, shpërtheu në lot, duke akuzuar në mënyrë indirekte klubin madrilen për presion ndaj arbitrave përmes përmbajtjes së publikuar në Real Madrid TV.
Sipas De Burgos, videot e publikuara kanë pasur ndikim negativ në jetën e tij personale dhe tek të afërmit e tij.
Në përgjigje, Real Madridi deklaroi:
“Real Madrid CF i konsideron të papranueshme deklaratat publike të bëra nga gjyqtarët e caktuar për finalen. Protesta të tilla, të bëra vetëm 24 orë para ndeshjes, përqendrohen në përmbajtjen e një mediaje të mbrojtur nga liria e shprehjes, siç është Real Madrid TV, dhe tregojnë armiqësinë e hapur ndaj klubit tonë.”
Klubi i bardhë e cilësoi “befasuese” edhe thirrjen e gjyqtarëve për unitet dhe paralajmërimin për masa, duke shtuar se një qasje e tillë dëmton parimet e drejtësisë, objektivitetit dhe paanshmërisë – në prag të një ndeshjeje që ndiqet nga qindra milionë njerëz në mbarë botën.
“Real Madridi shpreson që përgjegjësit në Federatën Spanjolle të Futbollit dhe trupi gjyqësor të ndërmarrin masa të menjëhershme për të ruajtur integritetin dhe prestigjin e institucioneve që përfaqësojnë”, përfundon deklarata.
Finalja pritet të zhvillohet nesër më 26 prill 2025, mes dy gjigantëve spanjollë – Real Madrid dhe Barcelona.