TIRANË– Pas hedhjes së shortit është konfirmuar që Shqipëria do të përballet me Anglinë, Serbinë, Letoninë dhe Andorrën, në kualifikueset e Botërorit 2026.
Ndërkohë nuk ka zgjatur shumë nga momenti i hedhjes së goglave, dhe ka ardhur reagimi i Presidentit të Federatës Shqiptare të Futbollit, Armand Duka.
“E dija rregullin e shortit. Nuk jam shumë i lumtur me atë që vendosën goglat. Mund të ishim në ndonjë grup tjetër. Duhet të pranojmë atë që vendosi shorti. Pasi pashë skuadrat e para në Grupe, ky ishte grupi që nuk do doja nga të gjitha. Nuk do doja një përballje me Anglinë, sepse i konsideroj si një nga ekipet më të forta. Anglia është shumë e vështirë. Serbia është një kundërshtar me problemet e veta. Nuk kemi eksperienca të mira nga përballja në Beograd. Uroj këtë herë të jetë ndryshe. Andorra nuk më pëlqente, sepse ndeshjet janë në tre ditë dhe duhet të udhëtosh nga Barcelona për 3 orë. Nuk ka kohë për të qarë. Të shohim kalendarin dhe t’i përvishemi punës me këmbë në tokë. Të luftojmë për një biletë në Botëror. Asgjë nuk është e pamundur. Presidentes së Federatës Angleze i thashë që nuk doja ata në grup, por ashtu ndodhi. Është luks të luash ndaj Anglisë. Është vështirë për rezultat, por kam besim. Organizimi në Beograd i takon Federatës Serbe, ne na takon të fitojmë. Serbia luan në “play off” dhe prandaj me ta do të përballemi në vjeshtë. Të gjitha janë të rëndësishme, jo vetëm Anglia”, u shpreh Duka./Radar.al
Grup “ferri” për Botëror, Shqipëria rigjen Anglinë dhe sfidon Serbinë pas 10 vitesh