Kryeministri spanjoll, Pedro Sánchez, shprehu solidaritet me Libanin gjatë një bisede telefonike me kryeministrin libanez Nawaf Salam, duke theksuar se sulmet ndaj Forcës së Përkohshme të Kombeve të Bashkuara në Liban (UNIFIL) “duhet të ndalen menjëherë”.
“Libani nuk e ka zgjedhur këtë luftë dhe sovraniteti dhe integriteti i tij territorial duhet të respektohen”, shkroi Sanchez në X. Ai shtoi se trupat spanjolle në UNIFIL po kryejnë “punë të lavdërueshme” dhe sulmet ndaj misionit paqeruajtës janë të papranueshme.
UNIFIL operon në jug të Libanit që nga viti 1978 dhe u zgjerua sipas Rezolutës 1701 të OKB-së pas luftës së vitit 2006 midis Izraelit dhe Hezbollahut. Sulmet izraelite që nisën pas një incidenti ndërkufitar më 2 mars kanë shkaktuar të paktën 1.497 të vrarë dhe mbi 4.400 të plagosur në Liban.