Komisioni Zonal i Administrimit të Zgjedhjeve për Votën nga Jashtë ka dështuar të marrë një vendim në lidhje me zarfet e ardhura nga Greqia, çka ka shtyrë Partinë Socialiste t’i drejtohet me një kërkesë zyrtare Komisionit Qendror të Zgjedhjeve.
Shkak për këtë ngërç është bërë kërkesa e koalicionit opozitar për ndarjen e veçantë të këtyre zarfeve. Si pasojë, KQZ vendosi më herët që ato të numërohen në fund të procesit.
Në letrën drejtuar KQZ-së, Partia Socialiste shpreh shqetësimin se gjatë procesit të numërimit nga Grupet e Numërimit të Votës nga Jashtë, është konstatuar se rreth 25% e zarfeve të tipit B janë kontestuar nga anëtarët e grupeve, “pa asnjë arsye apo shkak të dukshëm”.
PS kërkon nga KQZ marrjen e masave për të garantuar mbarëvajtjen dhe integritetin e procesit të votës nga jashtë, duke theksuar nevojën për shmangien e bllokimeve të panevojshme dhe ndërhyrjeve politike.