“O kthehu me mua, ose do ta vras”. Ky ishte një nga mesazhet që hetuesit gjetën në celularin e Mark Antony Samson, i cili ka pranuar vrasjen e ish të dashurës së tij, Ilaria Sula, ngjarje që ndodhi në mars në Romë. Vajza u godit me tre thika në qafë, ndërsa trupi i saj, i fshehur në një valixhe, u hodh në një rrëpirë pranë rrugës Via Homs.
Në bazë të provave të mbledhura, Prokuroria e Romës e akuzon të riun për vrasje me paramendim, me motive të ulëta dhe për shkak të marrëdhënies sentimentale me viktimën.
Drejt gjykimit të menjëhershëm
Sipas hetuesve, nga analizimi i mesazheve të shkëmbyera nga Samson me disa shokë, del një projekt i qartë i femicidit. Sot, të hënën më 7 korrik, i riu u pyet sërish dhe për rreth dy orë i përgjigjej pyetjeve të prokurorëve. Prokuroria po përgatitet të mbyllë hetimet dhe mund të kërkojë gjykim të menjëhershëm. Në hetim është përfshirë edhe nëna e tij, e dyshuar për bashkëpunim në fshehjen e trupit.
Mesazhet në chat
Sipas hetuesve, Samson ka tentuar të devijojë hetimet përmes bisedave në chat, duke u paraqitur si Ilaria tek shoqet e saj. Në një mesazh thuhet: “Sofi, nuk di nëse po bëj ndonjë budallallëk, por po shkoj në shtëpinë e një djali që takova rrugës”. Këto mesazhe janë nga data 26 prill 2025, pak kohë pas femicidit të studentës.
Rrëfimi i tmerrshëm
Në një rrëfim tronditës para prokurorit dhe gjyqtares Antonella Minnuni, Samson përshkroi me qetësi tmerrin e femicidit: “I dhashë dy thika nga pas, me thikën që përdornim për të prerë mortadelën. Ilaria nuk kuptoi asgjë, bërtiti pak”. Më pas shtoi: “E vendosa në dy qese që kisha në kuzhinë. Gradualisht po kuptoja çfarë kisha bërë dhe sa i madh ishte problemi për mua. Më erdhi në mendje ajo që tha gjyshi im para se të vdiste: ‘Për gjithçka ka zgjidhje, përveç për të vdekurit’”.