Moska ka reaguar me tone të ashpra ndaj çdo ideje për eliminimin e udhëheqësit suprem iranian, Ajatollah Ali Khamenei. Zëdhënësi i Kremlinit, Dmitry Peskov, e cilësoi si “të papranueshëm” çdo diskutim për ndryshim të dhunshëm të regjimit në Iran, duke e krahasuar me hapjen e “kutisë së Pandorës”.
“Është e paimagjinueshme, madje edhe të flasësh për këtë është e papranueshme”, tha Peskov për Sky News, duke paralajmëruar se një akt i tillë do të nxiste ekstremizëm dhe destabilizim të madh në rajon.
“Çdokush që diskuton për vrasjen e Khameneit duhet të kuptojë pasojat. Do të jetë një hap i rrezikshëm që mund të çojë në shpërthimin e një zinxhiri ngjarjesh të pakontrollueshme”, theksoi ai.
Deklarata e Kremlinit vjen në një kohë tensioni të lartë mes Iranit dhe Izraelit, teksa frika për një përshkallëzim të madh rajonal po rritet ndjeshëm.