Pesë orë biseduan në Kremlin presidenti i Rusisë Putin dhe i dërguari i SHBA-së Witkoff lidhur me planin 28 pikësh për t’i dhënë fund luftës në Ukrainë. Një këshilltar i Putinit e vlerësoi bisedën të dobishme.
Pas takimit me presidentin e Rusisë Vladimir Putin në Moskë i dërguari SHBA-së Steve Witkoff, sipas të dhënave të Kremlinit, do të kthehet në SHBA, për të informuar presidentin Donald Trump lidhur me rezultatet e bisedimeve. Më pas përfaqësues të SHBA-së, ndër ta edhe dhëndri i Trumpit Jared Kushner, sërish do të marrin kontakt me Rusinë, tha për mediat ruse këshilltari i Putinit Juri Ushakov pas bisedimeve që zgjatën rreth pesë orë në Kremlin. Në takim është diskutuar për pikat e planit të paqes të Trumpit për t’i dhënë fund luftës në Ukrainë.
Ende nuk ka kompromis për territoret
Ushakov i cilësoibisedimet si konstruktive, me përmbajtje dhe të dobishme. Palët, sipas tij, nuk janë shumë larg një paqeje, por as edhe nuk janë afër një zgjidhjeje të konfliktit. Ka ende shumë punë, tha Ushakov. Ende nuk ka një kompromis lidhur me çështjen e shkëputjes së territoreve ukrainase që kërkon Rusia. Putin kërkon të gjithë Donbasin, ndonëse ai nuk i kontrollon disa pjesë të këtij rajoni. Kievi vazhdimisht e hedh poshtë këtë kërkesë.
Një plan paqeje prej 28 pikash u bë publik në fund të nëntorit. Por ky plan ditëve të fundit ka pësuar ndryshime, sepse për Ukrainën dhe shtetet europiane shumë nga propozimet fillestare nuk janë të pranueshme. Së fundi SHBA-ja punoi në nivel bilateral me Ukrainën për planin.
Putin që prej më shumë se tre vjet e gjysmë i ka dërguar trupat në Ukrainë./DW