Kolegji i Posaçëm i Apelimit (KPA) vendosi sot shkarkimin nga detyra të prokurores së Shkodrës, Marsida Frashëri, duke rrëzuar vendimin e mëparshëm të Komisionit të Pavarur të Kualifikimit (KPK), i cili e kishte konfirmuar në detyrë pas ndjekjes së një trajnimi njëvjeçar në Shkollën e Magjistraturës.
Prokurori Klodian Braho, i autorizuar nga drejtuesi i SPAK, Aktin Dumani, argumentoi para Kolegjit se Frashëri kishte dështuar në përmbushjen e detyrave profesionale dhe kishte cënuar rëndë besimin e publikut tek drejtësia. Ai përmendi si shembull dhjetëra çështje hetimore të lëna në harresë, përfshirë dosje të mbajtura në sirtar për vite, të cilat përfunduan të parashkruara pa asnjë veprim nga prokurorja.
Në vitin 2022, KPK kishte vendosur pezullimin njëvjeçar të Frashërit dhe trajnimin e saj në Shkollën e Magjistraturës, si pasojë e gjetjeve negative në rreth 27 dosje dhe tre hetimeve disiplinore të mëparshme, përfshirë një masë uljeje në detyrë në vitin 2014. Pavarësisht përfundimit të suksesshëm të trajnimit dhe vlerësimeve pozitive për pasurinë dhe figurën, Komisioneri Publik Florian Ballhysa kërkoi shkarkimin e saj, duke e konsideruar të papërshtatshme për vazhdimin në detyrë.
Frashëri kundërshtoi ankimin, duke argumentuar se vendimi për pezullimin dhe trajnimin e saj ishte i formës së prerë dhe nuk mund të ankimohej. Ajo theksoi ngarkesën e lartë në punë dhe vlerësimet pozitive që kishte marrë, ndërsa pretendoi se KPA po cenonte parimin e “gjesë së gjykuar”.
Megjithatë, KPA vendosi shkarkimin e saj nga funksioni, duke konstatuar se mangësitë profesionale dhe veprimet e përsëritura bien ndesh me standardet që kërkon një magjistrat dhe dëmtojnë perceptimin publik ndaj sistemit të drejtësisë.