Një incident ushtarak ka tensionuar përsëri gadishullin korean, pasi trupat e Koresë së Veriut kaluan për pak çaste kufirin tokësor. Ushtria koreano-jugore reagoi duke qëlluar me të shtëna paralajmëruese, ndërsa Peniani e konsideroi këtë si një “provokim serioz”.
Sipas raportimeve, ushtarët veriorë u tërhoqën menjëherë, por gjenerali Ko Jong Chol paralajmëroi se kërcënimet ndaj kufirit mund të çojnë situatën drejt një faze të pakontrolluar. Ai shtoi se janë qëlluar mbi 10 të shtëna paralajmëruese nga mitralozi.
Koreja e Veriut akuzon Seulin për dyfytyrësi, duke theksuar se ndërkohë që shfaqet gatishmëri për dialog, ushtria jugore përkeqëson tensionet. Teknikisht, të dy vendet mbeten në luftë që nga Lufta Koreane (1950–1953), e cila përfundoi me armëpushim, pa traktat paqeje.
Marrëdhëniet janë në pikën më të ulët pas një serie raketash balistike nga Peniani vitin e kaluar, ndërsa Seuli ka qëlluar më parë paralajmëruese ndaj inkursioneve të trupave veriore.
Presidenti i Koresë së Jugut, Lee Jae-myung, i cili ndodhet aktualisht në Uashington për bisedime me homologun amerikan Donald Trump, ka premtuar rifillimin e dialogut pa parakushte dhe forcimin e besimit midis forcave të armatosura. Në Korenë e Jugut janë të vendosur rreth 28,500 ushtarë amerikanë, ndërsa vazhdojnë stërvitjet e përbashkëta ushtarake me Uashingtonin, të fokusuar mbi kërcënimet nga Koreja e Veriut.
Si pjesë e tensioneve, Seuli hoqi kohët e fundit altoparlantët kufitarë që transmetonin muzikë K-Pop dhe propagandë, ndërsa Peniani e mohoi këtë veprim.