Konsumimi i ujit të pijshëm të ambalazhuar ka shënuar rritje vit pas viti, por cilësia e tij nuk është e garantuar për qytetarët, sipas raportit të fundit të Kontrollit të Lartë të Shtetit (KLSH), i cili ka realizuar një auditim të thelluar për këtë segment.
Raporti konstaton se sistemi i ngritur nuk siguron kontroll të plotë të cilësisë së ujit të ambalazhuar që hidhet në treg. Sipas KLSH:
• Institucionet përgjegjëse nuk kanë përmbushur detyrimet e tyre për monitorimin dhe analizimin e ujit të pijshëm.
• Ndryshimet në kompetenca dhe strukturat shtetërore kanë krijuar paqartësi në rolet dhe përgjegjësitë, duke çuar në një funksionim fragmentar të sistemit.
• Kuadri ligjor dhe rregullator është i pa harmonizuar dhe në disa raste kontradiktor, duke kufizuar konkurrencën dhe krijuar kritere të dobëta për dhënien e lejeve dhe licencave.
• Mangësitë në analizime laboratorike, bashkëpunim ndërinstitucional dhe informimin e publikut nuk kanë garantuar cilësinë e ujit dhe sigurinë e nevojshme për qytetarët.
Raporti thekson se edhe kur autoritetet kanë identifikuar ujë të papërshtatshëm, hetimet nuk kanë qenë të plota, dhe transporti me autobot mbetet jashtë mbikëqyrjes.
Sipas të dhënave të Agjencisë së Menaxhimit të Burimeve Ujore, deri në fund të vitit 2024 janë regjistruar 52 leje përdorimi të burimeve ujore për ujë të pijshëm të ambalazhuar, që i përkasin 41 subjekteve tregtare. Nga këto:
• 14 leje janë me kontrata koncesioni (2004–2008) me afat rreth 30 vite
• Lejet e tjera kanë afate 5-vjeçare të dhëna nga Këshillat e Baseneve Ujore
KLSH nxjerr alarmin se pavarësisht rritjes së konsumit, qytetarët nuk mund të jenë të sigurt për cilësinë e ujit të pijshëm të ambalazhuar, dhe kërkon përmirësime urgjente në sistemin e kontrollit dhe rregullimit të këtij sektori.
