Kim Kardashian ka shpjeguar për herë të parë publikisht arsyen pse u hoqën nga Instagrami fotot ku shfaqej me Meghan Markle dhe Princ Harryn, të publikuara gjatë festës së 70-vjetorit të nënës së saj, Kris Jenner.
Fotot u zhdukën menjëherë pas publikimit, duke nxitur spekulime të shumta në media dhe rrjete sociale. E ftuar në podkastin “Khloe in Wonderland” të motrës së saj Khloe Kardashian, Kim vendosi të sqarojë situatën, e cila mes fansave u quajt “Photogate”.
Sipas Kim, gjithçka ishte krejtësisht e pafajshme dhe pa asnjë prapaskenë. Ajo theksoi se Kris Jenner dhe Meghan Markle kanë një miqësi të vjetër dhe një marrëdhënie shumë të mirë. Pas përfundimit të festës, familja kishte shqyrtuar fotot dhe kishte marrë miratimin për t’i publikuar ato.
Megjithatë, problemi lidhej me kohën e publikimit. Kim shpjegoi se më vonë u kuptua se fotot përkonin me Ditën e Përkujtimit në Britaninë e Madhe, një ditë e shenjtë kushtuar anëtarëve të rënë të forcave të armatosura, gjatë së cilës anëtarët e familjes mbretërore zakonisht shmangin paraqitjet festive.
Për këtë arsye, fotot u hoqën nga rrjetet sociale, si një shenjë respekti për këtë ditë përkujtimore. Kim shtoi se Meghan dhe Harry u shfaqën po atë mbrëmje në një event bamirës, gjë që u konsiderua më e përshtatshme, ndryshe nga pamjet e një feste ditëlindjeje.
Pas festës me temë “James Bond”, e zhvilluar në rezidencën e Jeff Bezos dhe Lauren Sanchez në Beverly Hills, Kris Jenner kishte publikuar një foto me çiftin Sussex, ndërsa Kim kishte ndarë një foto vetëm me Meghan Markle. Të dyja postimet u fshinë më pas.
Ndërkohë, mediat raportuan edhe një version tjetër të ngjarjes, sipas të cilit Meghan dhe Harry nuk kishin dhënë leje për publikimin e fotove. Megjithatë, Kim Kardashian mohoi këto spekulime, duke theksuar se vendimi për fshirjen e tyre erdhi vetëm nga respekti për Ditën e Përkujtimit.