Kryeministri Edi Rama riktheu kujtimet e dhimbshme të vitit 1997 gjatë një takimi me të rinjtë në Tiranë, duke krahasuar opozitën aktuale me skemat piramidale që sollën kolapsin financiar dhe shoqëror në Shqipëri.
“I keni parë ju këta të rinjtë që shesin qilima? Thonë ‘hip në qilim e fluturo’. Shqipëria e ka provuar një herë në ’97 se si është të fluturosh me qilim… Sudja, Rrapushi, Alimuça, Ceno – këto janë emrat e Shqipërisë madhështore të asaj kohe”, tha Rama me ironi, duke sulmuar drejtues të rinj të opozitës për mungesë alternative reale.
Ai theksoi se takimi nuk kishte simbole partiake, por vetëm flamurin kombëtar dhe atë të Bashkimit Europian: “11 maji nuk është tifozllëk, është zgjedhje për të ardhmen. Flamuri i BE-së sot nuk është thjesht ëndërr, por edhe garanci sigurie në një Europë që po përballet me kërcënime reale.”
“BE ka plan për t’u armatosur. Ne çfarë do bëjmë? Do merremi me mustaqet e Kujtim Gjuzit?”, shtoi më tej Rama, duke ironizuar fokusin e opozitës në çështje të vogla përballë sfidave të mëdha gjeopolitike.
Ai nuk kurseu as ironinë për procesin e primareve të PD-së: “Më shumë deputetë ka nga Big Brother sesa nga primaret e tyre.”