Një ngjarje e rëndë është regjistruar pasditen e së enjtes në Bjeshkën e Strellcit, në komunën e Deçanit, ku një person ka humbur jetën në rrethana që dyshohet të kenë qenë aksidentale.
Sipas Policisë së Kosovës, viktima dyshohet se është qëlluar aksidentalisht me armë zjarri nga djali i tij. Zëdhënësi i Policisë për rajonin e Pejës, Driton Rugova, bëri të ditur se autoritetet u njoftuan për rastin rreth orës 13:43.
“Policia ka pranuar informatën se në oborrin e një stani në Bjeshkën e Strellcit një person ka humbur jetën. Deri në këtë fazë, rasti po hetohet si vrasje aksidentale mes familjarëve”, deklaroi Rugova.
Pas marrjes së njoftimit, njësitë policore kanë dalë në vendin e ngjarjes, ku kanë sekuestruar armën e zjarrit që dyshohet se është përdorur. Personi i dyshuar është arrestuar, ndërsa hetimet për zbardhjen e plotë të rrethanave vijojnë.
Edhe Prokuroria Themelore në Pejë ka konfirmuar se po ndjek nga afër rastin. Zëdhënësi i saj, Shkodran Nikçi, tha se prokurori i shtetit dhe njësitë përkatëse policore ndodhen në vendngjarje, ku po kryejnë të gjitha veprimet e nevojshme hetimore.