Seanca plenare e 23 korrikut nuk do të jetë e fundit për këtë sesion parlamentar. Kryetari i Kuvendit, Niko Peleshi, ka firmosur një urdhër të ri, me të cilin thërret deputetët në një tjetër seancë plenare urgjente, që do të zhvillohet të hënën, më 27 korrik, në orën 10:00.
Pavarësisht se në përfundim të seancës së fundit ishte lënë të kuptohej se Kuvendi do të mbyllte punimet përpara pushimeve verore, me vendimin e ri deputetët do të duhet të rikthehen edhe një herë në sallën e Parlamentit.
Në njoftimin zyrtar drejtuar ligjvënësve, Peleshi bën me dije datën dhe orën e mbledhjes, ndërsa sqaron se procedurat e transmetimit do të jenë të njëjta si në seancat e mëparshme.
“Të nderuar kolegë, ju njoftoj se seanca plenare e Kuvendit të Shqipërisë do të zhvillohet ditën e hënë, datë 27.7.2026, ora 10:00. (Urdhër nr. 49, datë 24.07.2026, i Kryetarit të Kuvendit z. Niko Peleshi). Procedurat e transmetimit do të jenë të njëjta me ato të seancave plenare të mëparshme: makinat sinjalin do ta marrin nga RTSH dhe seanca do të transmetohet LIVE në RTSH Kuvend dhe në faqen zyrtare të Kuvendit në Facebook”, thuhet në njoftimin e firmosur nga kryeparlamentari.
Ndërkohë, bashkë me urdhrin është bërë publik edhe rendi i ditës i seancës së së hënës.
Pika e parë parashikon miratimin e procesverbalit të seancës plenare të datës 23 korrik, në zbatim të nenit 44 të Rregullores së Kuvendit. Më pas do të ketë njoftime, ndërsa në vijim deputetët do të shqyrtojnë projektvendimin “Për një ndryshim në vendimin nr. 87/2026, ‘Për caktimin e anëtarëve zëvendësues në përbërjen e komisioneve të përhershme të Kuvendit’, i ndryshuar”.
Projektvendimi do të votohet me shumicë të thjeshtë, në mbështetje të nenit 78 të Kushtetutës, si dhe të neneve 21/1 dhe 55 të Rregullores së Kuvendit.
Në përfundim të diskutimeve, seanca do të mbyllet me votimin e pikave të rendit të ditës.
Me këtë vendim, deputetët do të duhet të shtyjnë edhe për disa ditë nisjen e pushimeve verore, pasi Kuvendi do të zhvillojë edhe një tjetër seancë plenare përpara mbylljes së këtij sesioni parlamentar.
