Pas 13 vitesh heshtje, policia metropolitane në Londër ka rinisur kërkimet për Ilir Kumbaron, ish-zyrtarin e lartë të SHIK-ut shqiptar, i zhdukur në rrethana misterioze në vitin 2011, një ditë përpara se gjykata britanike të jepte vendimin për ekstradimin e tij drejt Shqipërisë.
Kumbaro, sot 70 vjeç, u arrestua në vitin 2008 në Mbretërinë e Bashkuar për llogari të drejtësisë shqiptare, e cila e kërkonte për rrëmbim dhe torturë të Remzi Hoxhës në vitin 1995. Por në dhjetor 2011, ai u zhduk pa lënë gjurmë, duke thyer masën e lirisë me kusht dhe duke shmangur vendimin e gjykatës.
Policia e Londrës ka lëshuar një apel të ri për ndihmë nga publiku, të shoqëruar me fotografinë e Kumbaros dhe pamje të vetme filmike nga viti 2010, kur ai firmoste në rajonin policor si pjesë e detyrimeve ligjore.
Në vitin 2012, Gjykata e Krimeve të Rënda në Tiranë e dënoi në mungesë me 15 vite burg, ndërsa dosja e Remzi Hoxhës – biznesmenit shqiptaro-maqedonas që u rrëmbye dhe u zhduk nga SHIK – vijon të mbetet një nga krimet më të rënda të pazbardhura të tranzicionit shqiptar.
Ngjarja përfshiu edhe figura të tjera të larta të SHIK-ut, por shumica prej tyre tashmë kanë ndërruar jetë, duke e lënë dosjen në një terr edhe më të thellë: Bashkim Gazidede, Budjon Meçe, prokurori Xhevat Hana dhe avokati John Jones – të gjithë ndërruan jetë në rrethana të ndryshme pas viteve 2008.
Sot, policia britanike nuk di ende nëse Ilir Kumbaro ka dalë nga Mbretëria e Bashkuar apo fshihet brenda saj nën identitet të rremë. Ndërkohë, familja e Remzi Hoxhës vazhdon të kërkojë drejtësi, ndërsa pyetja thelbësore mbetet ende pa përgjigje: ku është Ilir Kumbaro dhe çfarë ndodhi me Remzi Hoxhën?