Një shtetas shqiptar i shpallur në kërkim ndërkombëtar nga SPAK është arrestuar nga policia spanjolle, ku fshihej prej muajsh për të shmangur një dënim që mund të arrijë deri në 30 vite burg.
Sipas mediave në Spanjë, i arrestuari përdorte dokumente të falsifikuara dhe ishte regjistruar si qytetar kroat, me qëllim që të humbiste gjurmët nga autoritetet ligjzbatuese. Gjatë verifikimit të të dhënave, policia konstatoi se ndaj tij ishte lëshuar një njoftim i Interpolit që prej muajit maj, me kërkesë të Gjykatës së Posaçme Kundër Korrupsionit dhe Krimit të Organizuar në Shqipëri.
Burime nga organet e drejtësisë bëjnë me dije se i dyshuari është përfshirë në një operacion trafiku droge të nisur në shtator të vitit 2020. Ai dyshohet të ketë komunikuar me trafikantë të njohur për koordinimin e një ngarkese narkotikësh të destinuar për në Itali.
Gjithashtu, ai akuzohet se ka njoftuar bashkëpunëtorët për një kontroll policor në banesën e tij, ku u sekuestruan rreth 100 gram heroinë dhe pajisje që shërbenin për bllokimin e sinjalit. Hetuesit dyshojnë se pavarësisht kontrolleve, ai kishte arritur të zhvendoste pjesën tjetër të drogës dhe të vazhdonte aktivitetin kriminal.
I arrestuari ndodhet aktualisht në paraburgim në Spanjë, ndërsa kanë nisur procedurat për ekstradimin e tij drejt Shqipërisë.