Policia Kufitare në Pikën e Kalimit Kufitar të Kakavijës ka goditur një rast të mosdeklarimit të valutës në kufi, duke sekuestruar 14 mijë euro të padeklaruara që një shtetas po tentonte t’i nxirrte jashtë vendit në kundërshtim me ligjin.
Gjatë kontrollit të detajuar të ushtruar ndaj O. K., 40 vjeç, banues në Fier, shërbimet kufitare gjetën shumën e parave të fshehur në çantën personale të tij. Shuma u sekuestrua në cilësinë e provës materiale.
Ndaj shtetasit në fjalë është nisur procedimi penal në gjendje të lirë për veprën penale “Mosdeklarimi në kufi i të hollave dhe i sendeve me vlerë”.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme ligjore.
Policia Kufitare apelon për respektimin e detyrimit ligjor për deklarimin e çdo shume mbi kufirin e lejuar prej 10 mijë eurosh gjatë hyrjes ose daljes nga territori shqiptar.