Një përplasje institucionale ka ndodhur sot në Qendrën Administrative të Qeverisë së Republikës Serbe në Sarajevën Lindore, ku presidenti i entitetit, Milorad Dodik, ndodhej për një takim zyrtar. Forcat e Agjencisë Shtetërore për Hetim dhe Mbrojtje (SIPA) të Bosnjë dhe Hercegovinës tentuan të zbatojnë një urdhër-arrest të lëshuar nga Gjykata e Shtetit për Dodikun, por ndërhyrja e Policisë së Republikës Serbe bllokoi operacionin.
Zëdhënësja e SIPA-s, Jelena Miovçiç, konfirmoi zyrtarisht për mediat se agjentët shtetërorë vepruan mbi bazën e një urdhri të gjykatës për shkak të akuzës penale për moszbatim të vendimeve të Gjykatës Kushtetuese. Ajo shtoi se ndonëse forcat kishin tentuar të ekzekutonin urdhrin, pengesa nga Ministria e Brendshme e Republikës Serbe e pamundësoi arrestimin.
“Nuk është përdorur forcë gjatë incidentit,” sqaroi ajo, duke nënvizuar karakterin e tensionuar, por jo të dhunshëm, të situatës.
Ky zhvillim vjen pas vendimit të shkurtit 2025 nga Gjykata e Bosnjë dhe Hercegovinës, e cila dënoi Dodikun me një vit burg për mosrespektimin e vendimeve të Përfaqësuesit të Lartë. Gjithashtu, gjykata vendosi masë sigurie që i ndalon atij ushtrimin e funksionit të presidentit për gjashtë vjet nga momenti i hyrjes në fuqi të vendimit.
Përveç Dodikut, urdhër-arresti përfshin edhe kryeministrin e Republikës Serbe, Radovan Viskoviç, si dhe kryetarin e Kuvendit Kombëtar të këtij entiteti, Nenad Stevandiç.
Më herët gjatë ditës, Dodik ka qenë në Shekoviç, ku mori pjesë në nisjen e projektit për gazifikimin e zonës lindore të Republikës Serbe. Më pas, ai udhëtoi për në Sarajevën Lindore për një takim me kryetarin e bashkisë dhe përfaqësues të komunave të rajonit.
Ngjarja ka shkaktuar reagime të forta në opinionin publik dhe ka risjellë në vëmendje tensionet e vazhdueshme ndërmjet institucioneve shtetërore të Bosnjë dhe Hercegovinës dhe autoriteteve të Republikës Serbe.