Një 17-vjeçar, aktualisht i dënuar me dy vite burg për disa raste vjedhjesh, ka rrëfyer në një intervistë për RTVDukagjini jetën e tij të mbushur me krime, të nisur që në fëmijëri. I mituri tregon se që prej moshës 10-vjeçare ka qenë i përfshirë në grabitje, përdorim e shpërndarje droge, therje, lëndime trupore, madje edhe tentativë vrasjeje.
“Jam 17 vjeç, në burg që 8 muaj. I dënuar vetëm për vjedhje, por kam mbi 100 vepra të tjera. Kam filluar me drogë në moshën 10-vjeçare, marihuanë dhe kokainë. Kam pasur grabitje, therje, tentativa vrasjeje…”, ka deklaruar ai.
Një pjesë e rëndësishme e aktivitetit të tij kriminal lidhet me vjedhjen e automjeteve, të cilën e ka mësuar nga babai i tij, një ndihmës mekanik. Ai pohon se ka vjedhur mbi 40 makina, duke përfshirë edhe një BMW M4 me vlerë mbi 30 mijë euro. Të gjitha makinat i ka dokumentuar në telefon, në një lloj “koleksioni personal”.
“I kam shkruar të gjitha markat e makinave që kam vjedh. Vetëm për rreth 10 prej tyre jam ndëshkuar. Më i shtrenjti ishte një BMW M4. Një shok i babit i prishte makinat për pjesë, ai e dinte që ishin të vjedhura…”, rrëfen ai.
I mituri pohon se ka ndjerë ndikimin negativ të rrethit shoqëror dhe ka qenë i pambrojtur nga familja dhe sistemi në një moshë tepër të vogël.
Pavarësisht gjithçkaje, ai shprehet i penduar dhe thotë se dëshiron t’i japë fund jetës kriminale, duke shpresuar në një fillim të ri pas daljes nga burgu.
“Jam penduar për jetën që kam bërë. Dua të filloj nga e para”, thotë 17-vjeçari.
Rrëfimi i tij ngre shqetësime të mëdha për fenomenin e kriminalitetit të mitur, ndikimin e drogës në moshë të hershme, mungesën e kontrollit social dhe dështimin e mekanizmave të mbrojtjes së fëmijëve në rrezik.
Radar.al