Në Vjenë, më 13 maj 2025, do të hapet zyrtarisht ekspozita që sjell për herë të parë përpara publikut ndërkombëtar “Kalorësin e Babunjës” – një artefakt i rrallë arkeologjik, 2600-vjeçar, i zbuluar në fshatin Babunjë të Lushnjës, që i përket periudhës ilire.
Kjo ngjarje historike organizohet nga Ambasada e Shqipërisë në Austri, në bashkëpunim me Muzeun e Historisë së Natyrës në Vjenë – një nga më të njohurit në Europën Qendrore – dhe me mbështetjen e Akademisë së Shkencave të Shqipërisë. Artefakti do të qëndrojë i ekspozuar në “Sallën e Artë” të muzeut deri më 31 korrik 2025.
Ambasadori shqiptar në Austri, Fate Velaj, e cilësoi këtë aktivitet si një moment të veçantë për kulturën dhe shkencën shqiptare, që dëshmon vlerat historike të trashëgimisë sonë dhe i jep zë arkeologjisë shqiptare në skenën ndërkombëtare. Ai zhvilloi gjithashtu një takim me kryetarin e Akademisë së Shkencave, Prof. Dr. Skënder Gjinushi, për të koordinuar përgatitjet për prezantimin në Vienë.
Ekspozita pritet të tërheqë vëmendjen e studiuesve, ekspertëve të fushës dhe publikut të gjerë nga e gjithë Europa.