Pas një procesi gjyqësor që zgjati tre vite, Gjykata e Vlorës ka shpallur të pafajshëm pesë efektivët e policisë të akuzuar për shpërdorim detyre në lidhje me ngjarjen tragjike të 2 gushtit 2022, kur humbi jetën 7-vjeçarja Jonada Avdiaj në plazhin e Potamit, në Himarë.
Në seancën përmbyllëse, prokurorja kërkoi dënimin me nga 1 vit e 6 muaj burg për secilin prej efektivëve, por gjykata vendosi rrëzimin e akuzës dhe shpalljen e tyre të pafajshëm.
Gjyshi i Jonadës, Ismet Avdiaj, shprehu zhgënjimin e tij për News24 pas vendimit. “Ndjehem thellësisht i zhgënjyer nga drejtësia shqiptare. Asnjë nga pretendimet tona nuk u mor parasysh. Ky vendim është i padrejtë,” deklaroi ai.
Ngjarja tronditëse ndodhi kur gomonia e drejtuar nga ish-polici Arjan Tase goditi për vdekje të miturën që po lahej pranë bregut me babain e saj. Për këtë ngjarje, Tase u dënua me 18 vite burg për “vrasje me dashje”, por duke përfituar nga gjykimi i shkurtuar, dënimi iu ul në 12 vite.
Ndërkohë, çështja ndaj tetë efektivëve të tjerë të policisë u trajtua veçmas. Prokuroria i cilësoi ata përgjegjës për mungesë të masave të duhura të sigurisë në plazhe gjatë sezonit turistik, çka sipas saj, ndikoi në tragjedinë. Por më 16 korrik 2025, gjykata vendosi të hedhë poshtë akuzën e shpërdorimit të detyrës dhe i shpalli të gjithë të pafajshëm.
Vendimi ka ngjallur reagime të forta publike, sidomos nga familjarët e viktimës dhe qytetarë që kërkojnë llogaridhënie për sigurinë publike në plazhe.