Vrasja e gjyqtarit Astrit Kalaja brenda sallës së gjyqit, sapo dha vendimin, ka tronditur opinionin publik dhe ka ngritur shqetësime për sigurinë e magjistratëve në vend.
Lira Parruca, një familjare e Kalasë, ka folur ekskluzivisht për “Top Story” me Grida Dumën, duke ndarë kujtimet e saj më të ngushta dhe shqetësimet që gjyqtari i shprehte për punën.
“Titit, siç e kam quajtur gjithmonë, ishte pjesë e familjes sonë dhe gjithmonë i përkushtuar në profesion. Ai trajtonte çështje të vështira, por me drejtësi dhe profesionalizëm. Kur u takuam për herë të fundit, më tha: ‘Jemi pak gjyqtarë dhe shumë çështje’. Punonte darkave, fundjavave dhe edhe në pushime – nuk pushonte kurrë,” tregon Parruca.
Ajo e përshkruan Kalajn si një njeri të hapur, të dashur, me humor dhe shpirt të madh, i cili gjithmonë ndihmonte të tjerët dhe respektonte ligjin dhe njerëzit. “Edhe pse i lodhur, nuk ankohej për veten – fliste me përgjegjësi dhe dashuri për punën,” shton ajo.
Kalaja la pas një familje të mrekullueshme: bashkëshorten, tre fëmijët dhe një trashëgimi të jashtëzakonshme profesionale dhe njerëzore. “Astriti do të mbetet gjithmonë në kujtesën tonë si një njeri që dha dashuri, drejtësi dhe dritë,” përfundon Parruca.