Bashkia e Tiranës është goditur nga një tjetër sulm kibernetik, i konsideruar si një nga më të sofistikuarit deri më tani. Lajmin e bëri të ditur Kryetarja e Komanduar e Bashkisë, Anuela Ristani, e cila njoftoi se bëhet fjalë për sulmin e 15-të në vetëm gjashtë muaj.
Sipas saj, ndërhyrja u krye përmes komprometimit të një licence origjinale të Microsoft-it, duke treguar nivel të lartë sofistikimi. Megjithatë, Ristani theksoi se të gjitha të dhënat janë të paprekura dhe nuk ka humbje informacioni.
“Nga 80 serverë, vetëm 10 janë aktualisht nën vëzhgim. Jemi në proces verifikimi të aplikacioneve, përfshirë atë të çerdheve dhe kopshteve, si dhe shërbimet që lidhen me AKSH-in”, tha ajo.
Ristani sqaroi se, edhe pse sistemi nuk klasifikohet si infrastrukturë kritike dhe nuk është nën mbikëqyrjen direkte të Autoritetit Kombëtar për Sigurinë Kibernetike, Bashkia ka marrë masat e nevojshme për rikuperimin dhe mbrojtjen e plotë të sistemeve.
Ajo njoftoi gjithashtu nisjen e një faze të re rehabilitimi dhe forcimi të infrastrukturës digjitale në bashkëpunim me ekspertët më të mirë të fushës.
“Do të vazhdojmë të punojmë me transparencë dhe përkushtim për të mbrojtur të dhënat dhe interesin e çdo qytetari”, përfundon deklarata e saj.