Ndërsa Irani po përballet prej 11 ditësh me sulme të forta ushtarake nga SHBA dhe Izraeli, grupi i hakerave “Homeland Justice”, i lidhur më herët me sulmet kibernetike ndaj Shqipërisë, pretendon se ka depërtuar në sistemin e postës elektronike të administratës së Kuvendit të Shqipërisë.
Në një postim të publikuar këtë të martë në platformën Telegram, hakerat kanë shpërndarë disa materiale duke pretenduar se kanë akses në korrespondencën elektronike të punonjësve të Kuvendit.
Postimi i parë është publikuar në orën 11:46, ku shfaqen disa email-e që mbajnë datën 4 mars 2024, të cilat lidhen me komunikime të brendshme për njoftimet e seancave plenare, dorëzimin e dokumentacionit dhe kalendarin e punës së Kuvendit.
Më pas, në një tjetër postim në orën 12:58, grupi publikoi edhe disa pamje të tjera të korrespondencave që sipas tyre i përkasin muajve shkurt dhe mars.
Burime nga Kuvendi i Shqipërisë i thanë Top Channel se për momentin janë pezulluar përkohësisht shërbimet e brendshme të email-it, si në dërgimin ashtu edhe në marrjen e mesazheve nga adresat e administratës së institucionit.
Të njëjtat burime bëjnë me dije se prej disa orësh në ambientet e Kryesisë së Kuvendit ndodhen ekspertë të AKCESK (Autoriteti Kombëtar për Certifikimin Elektronik dhe Sigurinë Kibernetike) dhe të AKSHI (Agjencia Kombëtare e Shoqërisë së Informacionit), të cilët po analizojnë situatën dhe shkaqet që mund të kenë çuar në këtë incident kibernetik.
Nga ana e tij, Kuvendi i Shqipërisë ka reaguar shkurtimisht duke bërë të ditur se rasti po verifikohet dhe pritet një njoftim zyrtar.