Udhëheqësit e Bashkimit Evropian kanë shprehur mbështetje për vendosjen e kufizimeve të moshës për përdoruesit e mediave sociale, duke theksuar se vendimet e tilla do të respektojnë kompetencat kombëtare të secilit shtet.
Në një deklaratë të miratuar gjatë samitit të BE-së në Bruksel, Këshilli Evropian nënvizoi rëndësinë e mbrojtjes së të miturve përmes vendosjes së një moshe digjitale të shumicës, që kufizon përdorimin e rrjeteve sociale nga fëmijët, pa centralizuar këtë kompetencë tek Brukseli.
Presidentja e Komisionit Evropian, Ursula von der Leyen, ka propozuar më parë vendosjen e një moshe minimale për përdorimin e mediave sociale, duke e krahasuar këtë masë me kufizimet në konsumimin e duhanit dhe alkoolit. Ajo përmendi si shembull Australinë, ku legjislacioni i vitit 2024 kufizon aksesin në platformat sociale për fëmijët dhe adoleshentët.
Sipas rregullave të reja që pritet të hyjnë në fuqi në dhjetor, vetëm përdoruesit 16 vjeç e lart do të lejohen të regjistrohen në rrjetet sociale. Komisioni Evropian po punon aktualisht mbi themelet teknike të këtyre kufizimeve, përfshirë edhe ndërtimin e një aplikacioni verifikimi që synon të garantojë mbrojtjen e të miturve nga përmbajtja e papërshtatshme online.
Qëllimi është krijimi i sistemeve të besueshme për verifikimin e moshës dhe garantimin e një ambienti më të sigurt digjital për fëmijët dhe adoleshentët në të gjithë Europën.