Kryeministri Edi Rama ka njoftuar se po përgatit një libër të ri, i cili lidhet me fjalët e sofrës së iftarit, duke theksuar dashurinë e tij për gjuhën shqipe dhe shkrimin.
Në podkastin e tij “Flasim”, Rama rrëfeu se, ndonëse tani nuk ka më kohë për të shkruar gjatë si me librin “Kurban”, ai vazhdon të mbledhë copëza nga puna dhe fjalimet e tij, të cilat i përdor si materiale për shkrim.
“Jam dashnor i përkushtuar i gjuhës shqipe, më pëlqen të shkruaj. Madje, kur kam pasur rast të takohem me Ismailin, pjesa që më tërhiqte më shumë ishte kur arrija të fusja në bisedë për gjuhën. Ai e zotëronte shqipen në mënyrë të jashtëzakonshme dhe më pëlqente kur bënte krahasimin me rusishten,” tha kryeministri.
Ai shtoi se libri i ri është thjesht për kënaqësinë e shqipes, dhe jo për ndonjë arsye tjetër, duke shtuar se dëshiron që disa nga shkrimet e tij të shfaqen në një libër për publikun.