Kriza humanitare në Rripin e Gazës po thellohet teksa Izraeli ka urdhëruar evakuimin masiv të banorëve nga zonat jugore, përfshirë qytetet kryesore Rafah dhe Khan Younis, për shkak të një ofensive të re të përmasave të mëdha kundër grupeve militante.
Urdhri i publikuar në gjuhën arabe njofton qytetarët palestinezë të zhvendosen drejt Al-Mawasi, një zonë e caktuar si “humanitare”, në jugperëndim të Gazës. Ushtria izraelite theksoi se militantët vijojnë të lëshojnë raketa nga zonat e urdhëruara për evakuim, çka e justifikon sulmin që pritet të nisë së shpejti.
Sipas raportimeve nga terreni, shumë qytetarë kanë filluar të largohen, ndërsa mediat lokale dhe dëshmitarët njoftojnë për shumë viktima në Khan Younis, qyteti i dytë më i madh në territorin palestinez, të cilin Izraeli e ka cilësuar si një “zonë lufte të rrezikshme”.
Megjithatë, dy spitale kryesore – Nasser dhe Al-Amal – janë përjashtuar nga evakuimi, duke mbetur si pika të fundit të shpëtimit për të plagosurit dhe të sëmurët në qytet.