Komisioni Europian ka pranuar se zbatimi i sistemit të ri të regjistrimit të hyrje-daljeve (EES) ka shkaktuar vështirësi në disa pika kufitare të Bashkimit Europian, duke sjellë vonesa dhe pritje të gjata për mijëra udhëtarë gjatë sezonit veror.
Një zëdhënës i Komisionit deklaroi se institucionet europiane janë në dijeni të problemeve të hasura gjatë fazës së zbatimit dhe po bashkëpunojnë ngushtë me shtetet anëtare për të monitoruar situatën dhe për të ndërmarrë masat e nevojshme për përmirësimin e funksionimit të sistemit.
Megjithatë, Brukseli theksoi se nuk ka në plan të pezullojë EES-në, duke e konsideruar atë një element të rëndësishëm për modernizimin e kontrolleve kufitare dhe forcimin e sigurisë në kufijtë e jashtëm të Bashkimit Europian.
Sistemi i ri regjistron në mënyrë elektronike hyrjet dhe daljet e shtetasve të vendeve jashtë BE-së, duke zëvendësuar vulat tradicionale në pasaporta. Gjatë kontrollit kufitar, udhëtarëve u mblidhen të dhëna biometrike, përfshirë gjurmët e gishtërinjve dhe fotografia e fytyrës, me synimin për të përmirësuar menaxhimin e kufijve dhe identifikimin e shkeljeve të rregullave të qëndrimit.