Dy shkolla të menaxhuara nga Agjencia e OKB-së për Refugjatët Palestinezë (UNRWA), që përdorej si strehë për civilët në kampin e refugjatëve Shati, janë goditur nga sulmet izraelite, vetëm pak minuta pas thirrjes për evakuim të menjëhershëm.
Dëshmitarët raportojnë të vrarë dhe të plagosur mes civilëve që strehoheshin në ambientet e shkollave, ndërsa ende nuk ka një konfirmim zyrtar për numrin e viktimave. Sipas raportimeve, katër palestinezë u vranë dhe tre të tjerë u plagosën në zonën qendrore të Wadi Gaza, teksa kërkonin ndihmë humanitare.
Forcat e Mbrojtjes së Izraelit (IDF) njoftuan se mbi 250 mijë banorë të Gazës janë zhvendosur drejt zonave të sigurta humanitare, si Al Mawasi dhe pjesët qendrore të Rripit të Gazës, për t’u furnizuar me ndihmë dhe shërbime shëndetësore. IDF po ashpërson ofensivën për të shkatërruar Hamasin në rajon.
Agjencitë ndërkombëtare paralajmërojnë se situata humanitare po përkeqësohet, pasi shumë civilë nuk kanë ku të strehohen për shkak të mungesës së sigurisë dhe kushteve minimale për mbijetesë.