Tjetër anëtar i PSD së Tom Doshit mësohet se është nën hetim për blerje votash. Bëhet fjalë për Kryetari i Partisë Socialdemokrate në Malësi të Madhe, Ardian Hysën.
Burime për Report Tv kanë arritur të sigurojnë vendimin e gjyqtarit të GJKKO, Erion Bani, i cili pranoi kërkesën e Prokurorisë së Posaçme për ushtrim kontrolli personal të Hysës, biznesit të tij një servis makinash dhe mjetit të tij, një Benz Mercedes.
Kontrolle personale dhe banese mësohet se i është ushtruar edhe një qytetari nga Kopliku, Florenc Kalaj, i cili dyshohet se i ka kërkuar favor Ardian Hysës në këmbim të votave të tij dhe familjarëve të tij.
Në dosjen e siguruar nga referimi që është bërë në SPAK hidhen dyshime se Ardian Hysa, 46-vjeç, nga Kopliku, u angazhua në fushatën zgjedhore për PSD-në e Tom Doshit, duke ofruar para për zgjedhës të ndryshëm kryesisht në zonën e Malësisë së Madhe.
Shumat monetare SPAK njofton se merren nga përfaqësues të tjerë të kësaj partie politike, të cilët punojnë në qarkun e Shkodrës.
SPAK ka marrë në pyetje oficerët e policisë gjyqësore, të cilët kanë referuar materialin hetimor, Besmir Çardaku dhe Esmira Kurtaj, të cilët kanë thënë se informacionin e kanë marrë nga 3 burime të ndryshme policore për përfshirjen e kryetarit të PSD në Malësi të Madhe në blerje votash.
Policia ka zbardhur një komunikim të Ardian Hysës me qytetarin Florenc Tonin Kalaj, i cili i kërkon favore në këmbim të votave, edhe të njerëzve të tij.
Florenc Tonin Kalaj: Perzotin tash se di une jane pak vota e burr si i thone i kam te atyne qe janë njerzve te mi a kupton po une perzotin e kam i fije te veshtire me shku vete prej problemit qe kaт a kupton..”..” Po se di neqoftese bahet na i gjo si i thone asaj fales me mujt me mare ate letren…
Ardian Hysa: “Flasim prej afer..”
Pas disa minutash, shtetasit e mësipërm komunikojnë përsëri dhe shprehen se do të kontaktojnë nëpërmjet platformës Whatsapp.
Një tjetër komunikim i datës 5 maj 2025, kryetari i PSD Malësi të Madhe merr një mesazh nga një tjetër person që i shkruan “..Aa ja itash ika prej Koplikut se pata ul ata me mar kartat..”.
Pra një person që ka mbledhur kartat e qytetarëve për të votuar. SPAK thotë se nga përmbajta e këtyre komunikimeve krijohet bindja se Ardian Hysa në bashkëpunim me shtetas të tjerë ende të identifikuar, janë të përfshirë jo vetëm në blerje votash por edhe në marrja kartash qytetarëve të ndryshëm me me qëllim që këta të fundit të mos marrin pjesë në votimet e 11 Majit 2025.
