Policia e Tiranës ka vënë në pranga 31-vjeçarin Ferhat Kaja, pronar i rrjetit të bareve “Stockholm”, i cili ishte shpallur në kërkim prej 21 korrikut për dhunimin e pronarit të lokalit “Tokyo”, Laert Kasaj. Arrestimi u krye në zonën e “Komunës së Parisit”, ku Kaja u kap duke udhëtuar me Kid Kazazin, të shpallur në kërkim për një atentat të ndodhur në Fllakë të Durrësit.
Gjatë kontrollit, policia i sekuestroi Kajës një sasi municioni luftarak. Në timon ishte Kazazi, ish-kreu i Forumit Rinor të PD në Kavajë, i cili akuzohet për tentativë vrasjeje dhe armëmbajtje pa leje. Hetimet zbuluan se ai lëvizte me dokumente të falsifikuara me identitet italian.
Atentati i 30 majit në Fllakë, ku Kazazi qëlloi drejt një makine dhe la të plagosur Arbër Gorejën, dyshohet të ketë ndodhur për motive hakmarrjeje. Në automjet ndodheshin edhe dy të mitur që shpëtuan pa lëndime.