IRAN– Forcat e armatosura iraniane kanë deklaruar se kanë rrëzuar tre mjete ajrore amerikane, një avion furnizimi C-130 Hercules dhe dy helikopterë UH-60 Black Hawk.
Sipas autoriteteve në Teheran, incidenti ndodhi gjatë një misioni amerikan për shpëtimin e një piloti. Garda Revolucionare Iraniane ka bërë të ditur se disa “objekte fluturuese” u shkatërruan gjatë operacionit, duke nënkuptuar përfshirjen e drejtpërdrejtë të forcave amerikane.
Megjithatë, këto pretendime nuk janë konfirmuar nga Shtetet e Bashkuara. Presidenti amerikan, Donald Trump, e ka cilësuar operacionin si të suksesshëm, duke theksuar se një anëtar i ekuipazhit të një avioni luftarak F-15 u shpëtua “thellë në territor armik”. Ai ka shtuar gjithashtu se nuk ka pasur viktima nga ana amerikane.
Mbetet e paqartë se si përputhen këto dy versione të ngjarjes, apo nëse mjetet ajrore që Irani pretendon se ka rrëzuar kanë qenë pjesë e të njëjtit operacion apo të një misioni tjetër të veçantë. Situata vazhdon të mbetet e paqartë, ndërsa tensionet mes palëve mbeten të larta./Radar.al