Partneritetet publike-private dhe investimet e huaja në Shqipëri do të kalojnë përmes një mekanizmi të ri vlerësimi të mbështetur nga SHBA. Qëllimi është të sigurohen marrëveshje të drejta ekonomike, të rritet transparenca dhe të mbrohen sektorët kritikë nga aktorët me qëllime të dëmshme.
Ambasada Amerikane, në një reagim për gazetaren e Top Channel, Kristi Gongo, shpjegon se ky mekanizëm është një instrument juridik i përdorur gjerësisht për të filtruar investimet e huaja që mund të paraqesin rrezik për sigurinë kombëtare. Ai synon të krijojë një klimë më të hapur dhe të parashikueshme për investitorët ndërkombëtarë, sidomos për kompanitë amerikane.
“Një mekanizëm për shqyrtimin e investimeve i mundëson qeverive të verifikojnë investimet e huaja për të përcaktuar nëse ato paraqesin kërcënime të mundshme për sigurinë kombëtare. Një instrument i tillë do të mbronte sektorët kritikë të Shqipërisë nga aktorët keqdashës dhe do të krijonte një mjedis të drejtë e transparent për investitorët amerikanë dhe jo vetëm,” – tha Ambasada.
Pas takimit mes të Ngarkuarës me Punë, Nancy VanHorn, dhe ministres së Ekonomisë, Delina Ibrahimaj, ku u diskutua ofrimi i ekspertizës amerikane për koncesionet dhe ndërtimi i këtij mekanizmi të ri, Top Channel kërkoi më shumë detaje mbi funksionimin e tij.
Një zyrtar i Ambasadës theksoi se SHBA synon të forcojë bashkëpunimin ekonomik me Shqipërinë, duke mbështetur standarde të larta transparence dhe siguri.
“Shtetet e Bashkuara mbeten të përkushtuara ndaj zhvillimit ekonomik dhe partneriteteve të drejta për bizneset amerikane në Shqipëri, si dhe ndaj mbrojtjes së teknologjive kritike.”
SHBA vijon të ndajë rregullisht ekspertizën e saj me institucionet shqiptare përmes programeve dhe shkëmbimeve teknike në fushat me interes të përbashkët.