Një incident alarmant ka ndodhur në Aeroportin Ndërkombëtar të Orlandos, ku motori i një avioni të Delta Air Lines ka shpërthyer në flakë ndërsa po përgatitej për t’u ngritur. Avioni, një Airbus A330, ishte duke u nisur për në Atlanta me rreth 300 pasagjerë në bord, kur motori i tij mori flakë në orën 11:15 të mëngjesit, sipas Administratës Federale të Aviacionit (FAA).
Për fat të mirë, të gjithë pasagjerët, 282 pasagjerë dhe 12 anëtarë të ekuipazhit, u evakuuan menjëherë duke përdorur daljet e emergjencës, dhe nuk ka pasur raportime për lëndime. Delta Air Lines njoftoi se ekuipazhi ndoqi procedurat e duhura për evakuimin pas shpërthimit të flakëve në motor.
FAA ka nisur hetimin për të zbardhur shkaqet e incidentit, ndërkohë që ngjarje të ngjashme kanë nxitur shqetësime për sigurinë e aviacionit në SHBA.