Pak minuta para nisjes së ndeshjes mes SS Lazio dhe AC Milan në stadiumin Stadio Olimpico, drejtuesi i kuqezinjve Igli Tare foli për disa çështje që lidhen me klubin, mes tyre edhe për të ardhmen e mesfushorit kroat Luka Modrić.
Modriç ka një kontratë me Milanin që skadon në fund të sezonit, por marrëveshja përfshin edhe një opsion për zgjatjen e saj me një vit tjetër.
“Një gjë është e sigurt; Luka e do shumë Milanin dhe ne e duam shumë atë,” u shpreh Tare. “Mendoj se do të jetë një vendim i lehtë për të. Kontrata është aty nëse duam, sepse kemi opsion edhe për një vit tjetër. Duhet të vendosë ai vetë me shumë qetësi.”
Sipas drejtuesit kuqezi, mesfushori kroat ndihet mirë në skuadër dhe i pëlqen të vazhdojë të luajë me ekipin italian, ndërsa vendimi përfundimtar për të ardhmen e tij pritet të merret pas përfundimit të sezonit.