Nazmi Proga, babai i 42-vjeçarit, i cili u vra në Pogradec kërkon drejtësi për të birin.
Në një intervistë i moshuari është shprehur i zhgënjyer nga policia lidhur me trajtimin e rastit të të birit.
Sipas tij, Policia dhe ambulanca kanë shkuar me vonesë në vendin e ngjarjes dhe është tentuar që ta fshehin krimin vazhdimisht, madje edhe në spital, atje ku i biri ndërroi jetë.
“Dua të dalë e vërteta, kush e ka goditur? As unë nuk rrëzuar, as nuk ka pësuar infakt. Me Policinë jam tejet i zhgënjyer. Unë ditën që ndodhi kjo fatkeqësi isha me djalin para një ore. Fola me të, mirë e bukur tek lokali ynë dhe më pas u largova në shtëpi. Dhe pas një ore më lajmëruan që të ikja në spital. Atje e gjej djali të vdekur. Djalin e thërrasin në një lokal tjetër, nuk e di pse. Atje është bërë krimi, nuk e dimë kush e nxorri jashtë?
Dyshoj shumë në censurën që do të bëjë Policia. Jam shumë i zhgënjyer. Ambulanca ka ardhur me vonesë. Unë kërkoj ndihmë të përkushtuar nga shteti. Drejtësia të veprojë dhe të dali e vërteta. Policia të pastrohet nga elementë që nuk dinë të bëjnë punën. Unë një djalë kisha, e kam rritur me mund e me djersë. Ka dy fëmijë për të rritur, e la gruan e ve! Dhe unë nuk dua që të mbyllet ky muhabet kot më kot, po drejtësia ta vendosë pikën mbi ‘I’,”-tha babai i të ndjerit.