TIRANË- I mbuluar nga gjaku dhe me dhimbje, i shtrirë në mes të rrugës, inxhinieri i Entit Rregullator të Energjisë Elektrike, Lorenc Kosta, pasi është qëlluar me 6 plumba nga polici Erjon Goxhara, rezulton se ka telefonuar një koleg të tijin.
Detaji zbulohet në dosjen hetimore të Policisë të referuar në Prokurori. Efektivët mësohet se I kanë marrë dëshminë edhe kolegut të të plagosurit, shtetasi E.R punonjës pranë Entit Rregullator të Energjisë Elektrike i cili është shprehur:
“Rreth orës 13:55 Lorenc Kosta më ka telefonuar duke më thënë që më qëlluan poshtë shtëpisë. Shkova në vendngjarje menjëherë e pyeta si është ndërsa Lorenci më tha se e ka ndaluar shtetasi Erjon Goxhara, i ka thënë që do sqaronte dicka e më pas e ka plagosur me armë”, tha miku i tij.
Ngjarja e rëndë ndodhi mesditen e së hënës pranë rrethrrotullimit të Komunës së Parisit. 45 vjeçari Kosta u qëllua 6 herë nga polici ende në arrati për motive xhelozie.