Gjykata e Tiranës ka shtyrë seancën paraprake ndaj Elidon Kotorrit, një emër i njohur i botës së krimit në vitet 2000, i dënuar më parë për një vrasje të trefishtë. Prokuroria ka ngritur dy akuza të reja ndaj tij: kundërshtim të policisë dhe thyerje të masës së arrestit shtëpiak, që klasifikohet si arratisje nga vendi i dënimit.
Shtyrja e seancës erdhi pas vendimit për bashkimin e dy dosjeve në një gjykim të vetëm, ndërsa prokurori kërkoi kohë për t’u njohur me akuzën e dytë, të hetuar nga një koleg tjetër.
Kotorri la burgun në vitin 2019 pasi përfundoi një dënim prej 25 vitesh për vrasjen e Andi Hasanit, Sokol Alushit dhe Gazment Zenelit – një dënim që shmangu burgun e përjetshëm pas ndërhyrjes së Gjykatës së Strasburgut.
Në vjeshtën e vitit 2024, ai u arrestua sërish pas një konflikti për pronën, kur refuzoi të shoqërohej nga policia. Fillimisht u la në arrest shtëpiak, por u kap jashtë banesës, çka solli një hetim të ri dhe një rikthim në qeli.
Në seancën e sotme, Kotorri ishte i pranishëm dhe ndodhet aktualisht nën masën e arrestit me burg.