Fatmir Bejo, i shpallur në kërkim nga policia e Vlorës për sherrin e dhunshëm në lokalin e natës në Palasë, është një emër i njohur për autoritetet.
Ai ka qenë i përfshirë në një ngjarje të rëndë disa kohë më parë. Fatmir Bejo, së bashku me vëllanë e tij Albanin, në Kombinat, kanë marrë peng biznesmenin Gjergji Fela dhe e kanë dhunuar.
Sipas raportimeve të policisë në atë kohë, autori i arrestuar Alban Bejo pretendonte se Gjergj Fela i kishte një borxh prej 25 mijë eurosh.
Fela është biznesmen në fushën e ndërtimit dhe ngjarja ka ndodhur në Prill të vitit 2023.
LEXO EDHE: ‘Pse më lage me shampanjë’/ Sherri në Palasë, kush është Fatmir Bejo, policia e kërkonte…
NJOFTIMI I POLICISË PËR NGJARJEN E PENGMARRJES:
I hoqën lirinë një shtetasi, e kanosën dhe e dhunuan atë, për t’u dhënë një shumë parash, falë reagimit të menjëhershëm të Policisë, vihet në pranga 35-vjeçari dhe shpallet në kërkim vëllai i tij.
Shërbimet e Komisariatit të Policisë Nr. 6, menjëherë pas njoftimit se një shtetas ishte marrë me forcë nga 2 shtetas të tjerë, nga vendparkimi i një lokali në Kombinat, kanë organizuar punën për identifikimin dhe kapjen e autorëve, si dhe për zbardhjen e plotë të këtij rasti.
Si rezultat i reagimit të menjëhershëm dhe profesional të shërbimeve të Policisë, u identifikuan 2 autorët e dyshuar, u kap dhe u vu në pranga njëri prej tyre, shtetasi A. B., 35 vjeç, si dhe u shpall në kërkim bashkautori i dyshuar, vëllai i 35-vjeçarit, shtetasi F. B., 28 vjeç, të dy banues në Tiranë.
Nga veprimet hetimore dyshohet se këta shtetas, në bashkëpunim me njëri-tjetrin, mbrëmjen e djeshme, kanë marrë me forcë, me automjet, nga vendparkimi i një lokali, shtetasin Gj. F., 47 vjeç, e kanë kanosur dhe e kanë dhunuar atë, me pretendimin se 47-vjeçari u kishte borxh një shumë parash. Vijon puna për kapjen e shtetasit F. B. Materialet procedurale i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.