Policia e Tiranës ka finalizuar me sukses operacionin e koduar “Vendimi”, duke çuar në kapjen e një 43-vjeçari të shpallur në kërkim ndërkombëtar nga autoritetet italiane.
Si rezultat i veprimeve operacionale të Seksionit të Kërkimit, në bashkëpunim me Seksionin për Hetimin e Krimeve të Rënda në DVP Tiranë, u bë e mundur lokalizimi dhe arrestimi i Elton Miha në rrugën “Don Bosko”. Arrestimi i tij u krye me qëllim ekstradimin drejt Italisë.
43-vjeçari ishte dënuar nga Gjykata e Apelit e Firences në vitin 2015 me 11 vite e 10 muaj burgim për disa vepra penale, përfshirë “vjedhje të rëndë”, “shfrytëzim prostitucioni” dhe “shkelje të ligjit për migracionin”, sipas Kodit Penal italian.
Operacioni u zhvillua në kuadër të punës së policisë për kapjen e personave në kërkim, bazuar edhe në informacione të siguruara në rrugë operative.
Materialet hetimore janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për të vijuar procedurat për ekstradimin e tij drejt Itali.