Rebelët Houthi të Jemenit kanë lëshuar një tjetër raketë drejt Izraelit, vetëm disa orë pas përpjekjes së tyre të parë për sulm gjatë së njëjtës ditë.
Sipas burimeve izraelite të sigurisë, edhe raketa e dytë është interceptuar me sukses nga sistemet e mbrojtjes ajrore, ndërsa nuk raportohet për të lënduar. Më herët gjatë ditës, një tjetër raketë e lëshuar nga Houthit u neutralizua pa pasoja.
Ndërkohë, sipas medias The Times of Israel, një dron që dyshohet se është nisur nga Jemeni është kapur mbi qytetin jugor izraelit të Eilatit në orët e fundit.
Sulmet e sotme shënojnë përfshirjen e drejtpërdrejtë të Houthive në konflikt. Aktivizimi i sirenave të alarmit në të gjithë Izraelin detyroi banorët të strehohen përkohësisht, ndërsa ushtria njoftoi më pas se kërcënimi ishte neutralizuar dhe situata ishte nën kontroll.