Ministria holandeze e Mbrojtjes ka paralajmëruar se Rusia mund të ndërmarrë një fushatë ushtarake “në shkallë të kufizuar” kundër vendeve anëtare të NATO-s pas përfundimit të luftës në Ukrainë.
Në raportin vjetor mbi strategjinë e mbrojtjes, ministria thekson se Evropa ndodhet në një “zonë gri” mes luftës dhe paqes. Për këtë arsye, Holanda synon të rrisë investimet në mbrojtje, me fokus të veçantë te sistemet pa pilot dhe teknologjitë e avancuara të dronëve.
“Shërbimet holandeze të inteligjencës vlerësojnë se Rusia po përgatitet për një përballje afatgjatë me Evropën. Në skenarin më të keq, pas përfundimit të luftës në Ukrainë, mund të zhvillojë një konflikt të kufizuar ushtarak kundër vendeve anëtare të NATO-s”, thuhet në raport.
Ky paralajmërim vjen vetëm një javë përpara samitit të NATO-s, i cili do të zhvillohet më 7-8 korrik në Ankara, ku kërcënimi rus pritet të jetë një nga temat kryesore të diskutimeve.
Edhe Sekretari i Përgjithshëm i NATO-s, Mark Rutte, ka deklaruar se Rusia “mund të jetë gati brenda pesë viteve të ardhshme” për një përballje me Aleancën.
Në kuadër të forcimit të kapaciteteve mbrojtëse, Holanda planifikon të krijojë një laborator të posaçëm për zhvillimin e dronëve të aftë të neutralizojnë mjete të tjera ajrore pa pilot.
“Pyetja është nëse Evropa dhe Holanda do të jenë mjaftueshëm të forta në kohë për të mbrojtur lirinë, sigurinë dhe mënyrën tonë të jetesës,” deklaroi ministrja e Mbrojtjes, Dylan Yeşilgöz.
“Kjo është përgjegjësi e çdo brezi, por rrallëherë ka qenë kaq urgjente,” shtoi ajo.