Drejtoresha e Shërbimit Informativ të Shtetit (SHISH), Vlora Hyseni, paraqiti raportin vjetor të institucionit në Komisionin Parlamentar për Çështjet e Brendshme dhe Sigurinë Kombëtare, në një mbledhje me dyer të mbyllura që zgjati më shumë se dy orë.
Gjatë raportimit, Hyseni informoi deputetët mbi situatën e sigurisë në vend, nivelin e kërcënimeve ndaj sigurisë kombëtare, aktivitetet e shërbimeve të huaja të inteligjencës, si dhe sfidat që lidhen me operacionet e influencës, dezinformimin, terrorizmin, radikalizmin dhe krimin e organizuar.
Sipas informacioneve të siguruara nga gazetari i Top Channel, Muhamed Veliu, një nga pikat kryesore të raportit ishte rritja e kërcënimeve hibride.
“SHISH vlerëson se ka rritje të kërcënimeve hibride në formën e aktiviteteve influencuese malinje, fushatave të dezinformimit dhe operacioneve informative nga shërbimet e inteligjencës së vendeve kundërshtare ndaj proceseve integruese të Shqipërisë, të cilat shfrytëzojnë çdo zhvillim të rëndësishëm për të nxitur destabilitet dhe pasiguri. Në këtë kontekst, SHISH bashkëpunon me agjencitë ligjzbatuese dhe partnerët ndërkombëtarë për t’u kundërvënë këtyre aktiviteteve”, mësohet të ketë deklaruar Hyseni.
Para nisjes së raportimit, drejtoresha e SHISH u përball me akuza nga deputetët e opozitës, Klevis Balliu dhe Flamur Noka, të cilët pretenduan se shërbimi informativ është përdorur për të mbledhur informacione mbi protestuesit dhe për t’ia përcjellë ato Kryeministrit Edi Rama.
“Shërbimi Informativ është infiltruar në protestë. Është e çuditshme që kryeministri ka informacion të detajuar për çdo qytetar që flet për pesë minuta në protestë”, deklaroi Klevis Balliu.
Ndërsa Flamur Noka akuzoi SHISH se është përdorur në funksion të interesave politike.
“Keni involvuar totalisht shërbimin në funksion të karriges së Edi Ramës dhe jo të shtetit. Keni mbledhur informacione dhe dezinformacione për protestuesit, për të shuar protestën”, u shpreh ai.
Sipas burimeve nga komisioni, Vlora Hyseni i hodhi poshtë kategorikisht këto akuza.
“Po dezinformoni dhe po e përdorni, si gjithmonë, raportimin në komision për retorikë dhe interesa politike”, mësohet t’u ketë thënë ajo deputetëve të opozitës.
Raportimi i SHISH u zhvillua në një seancë të mbyllur, për shkak të natyrës së informacionit që lidhet me sigurinë kombëtare.