Në një ceremoni në Shtëpinë e Bardhë, udhëheqësit e Armenisë dhe Azerbajxhanit nënshkruan të premten një marrëveshje historike që synon t’i japë fund konfliktit disadekadësh mes dy vendeve. Marrëveshja, e ndërmjetësuar nga presidenti amerikan Donald Trump, përfshin rihapjen e korridoreve kryesore të transportit dhe krijimin e ashtuquajturës “Rruga Trump për Paqe dhe Mirëqenie Ndërkombëtare”.
Presidenti Trump e konsideroi nder të madh emërimin e rrugës në emrin e tij, megjithëse shtoi se nuk e kishte kërkuar vetë këtë. Një zyrtar i lartë amerikan bëri me dije se propozimi për emrin erdhi nga pala armene.
Kryeministri i Armenisë, Nikol Pashinyan, e përshkroi momentin si një “hap të rëndësishëm drejt një historie më të mirë se ajo e së kaluarës”, ndërsa presidenti i Azerbajxhanit, Ilham Aliyev, vlerësoi se korridori transit do të hapë mundësi lidhjeje për shumë vende dhe do të shërbejë si një rrugë drejt një partneriteti strategjik.
Të dy liderët falënderuan Trump-in dhe ekipin e tij, duke u bashkuar me shumë zyrtarë të huaj që mendojnë se presidenti amerikan meriton Çmimin Nobel për Paqe. Aliyev theksoi se Trump “e bëri një mrekulli brenda gjashtë muajve”.
Konflikti ndërmjet Armenisë dhe Azerbajxhanit për rajonin e Nagorno-Karabakut, i cili zgjati rreth 35 vjet, ka qenë shkak i dy luftërave të mëdha pas shpërbërjes së Bashkimit Sovjetik në vitin 1991. Marrëveshja e re synon normalizimin e marrëdhënieve, duke përfshirë edhe lidhjen e Azerbajxhanit me enklavën e Nakhçivanit, e cila më parë ishte e ndarë nga territori armen dhe kishte bllokuar bisedimet.
Radar.al