Qeveria e Sllovakisë ka miratuar një vendim që lejon therjen dhe më pas tregtimin e mishit të ariut të kafët, si përgjigje ndaj shqetësimeve të rritura për sigurinë publike, pas disa sulmeve të përsëritura nga këto kafshë ndaj banorëve dhe turistëve.
Kryeministri Robert Fico deklaroi se masa është ndërmarrë për të mbrojtur qytetarët dhe për të garantuar një ambient të sigurt: “Nuk mund të jetojmë në një vend ku njerëzit kanë frikë të hyjnë në pyll.”
Sipas planit të qeverisë, deri në 350 arinj do të qëllohen në kuadër të një programi për menaxhimin e popullsisë së tyre, numër ky që përkon me gjithë popullsinë e arinjve të kafët në Spanjë. Për dallim nga praktikat e mëparshme, trupat e kafshëve të vrara nuk do të hidhen, por do të përpunohen dhe mishi i tyre do të shitet në tregje dhe dyqane të autorizuara.
Kjo masë synon të kombinojë sigurinë publike me një qasje më të qëndrueshme ndaj burimeve natyrore, duke ofruar gjithashtu një alternativë të re ushqimore për konsumatorët. Produktet e para me mish ariu pritet të dalin në treg që nga java e ardhshme.