Guvernatori i Bankës së Shqipërisë, Gent Sejko, gjatë prezantimit të raportit vjetor për vitin 2024, theksoi se ekonomia shqiptare pritet të rritet me ritme të qëndrueshme në horizontin afatmesëm, duke krijuar premisa për përmirësimin e tregut të punës, rritjen e pagave dhe mirëqenien e qytetarëve.
Sipas Sejkos, vëllimi i aktivitetit ekonomik u rrit me 4% në 2024 dhe me 3,6% në gjashtëmujorin e parë të 2025, i nxitur nga zgjerimi i konsumit familjar, investimet private dhe të ardhurat nga turizmi. Megjithatë, rritja e importeve dhe vështirësitë e eksporteve për shkak të ngadalësimit të tregtisë botërore mbeten sfida për ekonominë.
Në tregun e punës, kërkesa e lartë për fuqi punëtore ka sjellë rritje të pagave mbi 9% në gjysmën e parë të vitit 2025, si dhe ulje të papunësisë në 8,5%. Inflacioni ka shënuar rënie, duke zbritur në rreth 2,2% për vitin 2024 dhe tremujorët e parë të 2025.
Sejko nënvizoi edhe forcimin e pozicionit financiar dhe të jashtëm të vendit: borxhi i jashtëm ra në 40,5% të PBB-së, rezervat valutore arritën 7 miliardë euro, ndërsa sektori bankar vijoi të tregojë stabilitet dhe rritje të aktivitetit.
Ndër masat e ndërmarra, Banka e Shqipërisë uli dy herë normën bazë të interesit dhe intensifikoi blerjet e valutës për të stabilizuar kursin e lekut, duke nxitur kreditimin për bizneset dhe familjet. Po ashtu, nisja e skemave SEPA dhe AIPS Euro pritet të sjellë kursime të konsiderueshme për ekonominë.
Megjithatë, Sejko paralajmëroi se sfidat strukturore mbeten dhe kërkojnë reforma në arsim, shëndetësi, infrastrukturë, klimën e biznesit dhe investimet strategjike.